Сағат 18.45 шамасында, Тарасал кентіне бұрылыс маңында «Tranco Express» ЖШС филиалына тиесілі ПАЗ автобусы, құқыққорғау органдарының алдын ала болжамы бойынша қарсы бағытқа шығып кеткен, МАЗ маркалы жүк көлігімен соқтығысқан. Автобуста жүргізушіден басқа, Шатыркөл кеніші ұжымын кәсіби қараудан өткізіп, Балқаш қаласына қайтып келе жатқан «Жезқазған медициналық орталығы» ЖШС-нің он бір медицина қызметкері болған. Жол-көлік оқиғасы салдарынан апат орнында екі жүргізуші, сондай-ақ «ПАЗ» автокөлігінің тағы бір жолаушысы қайтыс болды. Тағы бір жолаушы жедел жәрдем көлігінде жолда көз жұмды. Қалған жолаушылар түрлі дәрежедегі жарақат алды. Барлық зардап шеккендер Балқаш, Приозерск қалаларының медициналық мекемесіне жеткізілді. Жол полициясының қызметкерлері оқиғаның мән-жайы мен себептерін анықтап жатыр. «Қазақмыс» компаниясының басшылығы мен еңбек ұжымы қаза болғандардың туыстары мен жақындарына көңіл айтады.