Тамыз айында Қазақмыстың барлық өндірістік алаңдарында көлік қауіпсіздігі айлығы басталады. Осы кезеңде компания өндірістік көлікті пайдалану қауіпсіздігіне бақылауды күшейтіп, техникаға ауқымды тексеру жүргізеді және жұмыскерлер үшін қосымша оқытуды ұйымдастырады. Іс-шара 2026-2030 жылдарға арналған өнеркәсіптік қауіпсіздікті трансформациялау стратегиясы аясында жүзеге асырылады.

Көлік қауіпсіздігі кәсіпорынның өнеркәсіптік қауіпсіздік жүйесіндегі негізгі бағыттардың бірі болып табылады. Өздігінен жүретін ауыр техниканы пайдалану өндірістік тәуекелдің жоғары деңгейімен байланысты. Осыған орай корпоративтік бағдарламаның кезекті кезеңі жерүсті және жерасты жағдайында жол-көлік оқиғаларының алдын алуға, сондай-ақ өндірістік жарақаттану тәуекелін төмендетуге бағытталған.

Осы ай бойы барлық өндірістік бөлімшелерде кешенді практикалық іс-шаралар жүзеге асырылады. Мамандар автокөлік паркіне техникалық тексеру жүргізіп, тежегіш пен рульдік басқару жүйелерінің, жарықтандыру құрылғыларының және техниканы қауіпсіз пайдалануға әсер ететін өзге де элементтердің жарамдылығын тексереді. Сонымен қатар көлік құралының күзгі-қысқы пайдалану кезеңіне дайындығы бағаланады.

Жұмыскерлерді оқытуға ерекше назар аударылады. Жүргізушілер, машинистер және желілік басшылар үшін техниканы қауіпсіз басқару, маневр жасау ережелері, сондай-ақ корпоративтік «360 қағидасы» стандарты негізінде көлік құралын ауысым алдында тексеруден өткізу тәртібі бойынша мамандандырылған оқу сабағы ұйымдастырылады.

Өндірістік алаңдарда қауіпсіздік талабының қолжетімділігін арттыру мақсатында көрнекі ақпараттық материалдар жаңартылады. QR-кодтың көмегімен жұмыскерлер корпоративтік стандарттар мен техниканы қауіпсіз пайдалану жөніндегі нұсқаулықтарға жедел қол жеткізе алады.

Тамыз өнеркәсіптік қауіпсіздікті трансформациялау жөніндегі корпоративтік бағдарлама аясындағы үшінші тақырыптық айға айналады. Бұған дейінгі іс-шаралар биіктікте қауіпсіз жұмыс істеуге және қауіпті энергия көздерін оқшаулау рәсімдерін (LOTO) қолдануға арналған болатын. Енгізілген барлық талаптар тұрақты негізде қолданылады және оларды орындау міндетті болып табылады.

Қауіпсіздік бойынша тақырыптық айлар жұмыскерлердің назарын өндірістік тәуекелдердің ең маңызды бағыттарына аударуға және өндірістік нысандардағы алдын алу жұмысын күшейтуге мүмкіндік береді. Бағдарламаның басты мақсаты – әрбір жұмыскердің күн сайын жұмыс орнынан аман-есен үйіне оралуына жағдай жасау өзгеріссіз қалады.