Кездесу барысында компанияның 2040 жылға дейінгі даму бағдарламасы, Ұлытау облысын қайта құруға, корпорацияны қайта тіркеуге, сондай-ақ басқа да ағымдағы өндірістік мәселелерге қатысты мәселелер көтерілді. "Жезқазған кен орнының өндіріс көлемін сақтау және өмір сүру мерзімін ұзарту мақсатында Жезқазған өңірін дамытудың 2040 жылға дейінгі бағдарламасын іске асыру қажет. Осы мақсатта Жыланды кен орнын игеру, оның ішінде кеніштердің жұмысын тұрақтандыру бойынша іс-шаралар жоспарлануда" - деп атап өтті Андрей Павлович. Ұлытау облысын қайта жаңғыртуға байланысты компания басшылығы "Қазақмыс корпорациясы" ЖШС-нің заңды мекенжайын Жезқазған қаласында бекітіп, тиісті заңдық рәсімдерді жүргізе отырып, ауыстыру туралы шешім қабылдады. Кездесу барысында үш аймақты: Жезқазған, Қарағанды, Балқашты дамыту, Жезқазған және Балқаш кен байыту фабрикаларын жаңғырту, Құсмұрын және Жайсаң кен орындарының жұмысы талқыланды . Кездесу соңында Андрей Гайдин көпұлтты еңбек ұжымын келе жатқан Қазақстан халықтарының бірлігі мерекесімен құттықтап, барша қатысушыларға денсаулық, достық, бейбітшілік, отбасыларына береке тіледі!