Жезқазған қаласында өңірдің тау-кен өнеркәсібін дамытуда маңызды рөл атқарған кәсіпорындардың бірі – Оңтүстік-Жезқазған кенішінің 60 жылдық мерейтойына арналған салтанатты іс-шара өтті.

Оңтүстік-Жезқазған кеніші 1965 жылдың тамыз айында пайдалануға берілді. Кейінгі онжылдықтарда кәсіпорын өңірдің мыс саласын кенмен қамтамасыз ететін «Қазақмыс» өндірістік жүйесінің бір бөлігіне айналды.

Кәсіпорында еңбек еткен жылдар ішінде кеншілердің кәсіби мектебі қалыптасып, бүгінде заманауи мамандар жалғастырып келе жатқан дәстүрлер орнықты. Мерейтойлық іс-шараның негізгі тақырыптарының бірі де осы ұрпақтар сабақтастығы болды.

Ұжымды құттықтаған «Қазақмыс Корпорациясы» ЖШС Бақылау кеңесінің төрағасы Нұрмұхамбет Әбдібеков кәсіпорын қызметкерлерінің өндірісті дамытуға қосқан үлесін атап өтіп, кеніштің жетістіктері бірнеше буын мамандарының көпжылдық еңбегінің нәтижесі екенін айтты. Ардагерлерге ерекше алғыс білдірілді.

«Бүгінгі таңда Оңтүстік-Жезқазған кеніші бірнеше буын кеншілерінің ерік-жігері, кәсібилігі, табандылығы және адал еңбегінің арқасында осындай деңгейге жетті», – деп атап өтті Нұрмұхамбет Әбдібеков.

Мерейтой көпжылдық жұмыстың қорытындысын шығаруға ғана емес, алдағы міндеттерді айқындауға да мүмкіндік берді. Негізгі басымдықтардың бірі – өнеркәсіптік қауіпсіздік талаптарын мүлтіксіз сақтай отырып, өндіріс тиімділігін арттыру болып қала береді.

«Өндіріс тиімділігін арттырумен қатар, кеншілердің қауіпсіздігін басты құндылық ретінде сақтауымыз керек», – деп атап өтті Нұрмұхамбет Әбдібеков.