25 Шіл 2025

Қауіпсіздік – басты назарда: Қазақмыста «Жер-2025» командалық-штабтық жаттығуы өтті

«Қазақмыс корпорациясы» ЖШС Шығыс Жезқазған кенішінің №57 шахтасында төтенше жағдай кезіндегі әрекетті пысықтауға бағытталған «Жер-2025» республикалық командалық-штабтық оқу-жаттығуы өтті.

Сценарий бойынша жер сілкінісі салдарынан шахтада тау жынысы опырылып, әкімшілік-тұрмыстық кешен ғимаратында өрт шықты.

Қысқа мерзімде төтенше жағдайды жою бойынша штаб құрылып, шұғыл әрекет ету қызметі мен Қазақмыс жұмыскерлері арасында бірлескен іс- қимыл ұйымдастырылды. Апаттық аумақты тексерген құтқарушылар шартты түрде жарақаттанған адамды сыртқа алып шығып, жедел жәрдем бригадасына тапсырды. Өрт сөндірушілер өртті сөндіріп, адамдарды эвакуациялады.

Оқу-жаттығуға Ұлытау облысының ТЖД күштері, Сәтбаевтың өрт сөндіру бөлімшелері, жедел жәрдем бригадалары, «Серіктес» апаттық-құтқару қызметінің мамандары, сондай-ақ Шығыс Жезқазған, Оңтүстік Жезқазған және Батыс кеніштерінің жұмыскерлері қатысты.

Қазақмыстың өндірістік алаңдарында оқу-жаттығу жүйелі түрде өткізіледі. Бұл өнеркәсіптік қауіпсіздікті қамтамасыз ету және қызметкерлерді төтенше жағдайға дайындауға бағытталған жүйелі жұмыстың бір бөлігі.